यथा प्रव्रजितो रामो मातुर्दत्ते वरे तव | यथा च पुत्रशोकेन राजा दशरथो मृतः || ६-१२६-५ यथा दूतैस्त्वमानीतस्तूर्णं राजगृहात्प्रभो | त्वयायोध्यां प्रविष्टेन यथा राज्यं न चेप्सितम् || ६-१२६-६ चित्रकूटं गिरिं गत्वा राज्येनामित्रकर्शनः | निमन्त्रितस्त्वया भ्राता धर्ममाचरिता सताम् || ६-१२६-७ स्थितेन राज्ञो वचने यथा राज्यं विसर्जितम् | आर्यस्य पादुके गृह्य यथासि पुनरागतः || ६-१२६-८ सर्वमेतन्महाबाहो यथावद्विदितं तव | त्वयि प्रतिप्रयाते तु यद्वृत्तं तन्निबोध मे || ६-१२६-९

yathaa pravrajito raamo maaturdatte vare tava | yathaa cha putrashokena raajaa dasharatho mR^itaH || 6-126-5 yathaa dUtaistvamaanItastUrNaM raajagR^ihaatprabho | tvayaayodhyaaM praviShTena yathaa raajyaM na chepsitam || 6-126-6 chitrakUTaM giriM gatvaa raajyenaamitrakarshanaH | nimantritastvayaa bhraataa dharmamaacharitaa sataam || 6-126-7 sthitena raaGYo vachane yathaa raajyaM visarjitam | aaryasya paaduke gR^ihya yathaasi punaraagataH || 6-126-8 sarvametanmahaabaaho yathaavadviditaM tava | tvayi pratiprayAte tu yadvR^ittaM tannibodha me || 6-126-9